Thursday, June 7, 2012

Kusai pinopooput dawai lotilik au pavasaon napatai nakalon

7th June, 2012

LAHAD DATU: Kinaantakan i nokoimang do songuhun kusai kinoizonon kiumul posoihi 50’dan id kokampungan Vatu 8, Segama, somok doiti, di songian nokito poimpatai nakalon do lotilik, id kinaantakan di minsosodop songkoniab.

Di poguhui diho, kikotumbazaan i munggui do kumininam monoodo pongoputan vinakas lotilik miampai au kavasda ‘magapon’ kable potihombus mantad dawai lotilik id sosomok.

Naamot diho, minoboos i Potunud Ponguhudan Sabah Electricity Sdn Bhd (SESB), Ir. Haji Abd Razak Salim do mantad asil kopoihaan tuhun ginumuan, iso tinimunga puu kalaja SESB minongoi id hivang kinaantakan om nokoikot do doiti di jaam ko 6.30 minsosodop, nga noovit no i munggui minuhi id hamin dau.

Ka disido, id pinomolisaan kotihombusa id hivang kinaantakan nga pinapanau nogi tuutulus montok mongiho kozo do aiso vinakas lotilik mantad tapanazan pongoputan au pavasaon diho.

“Iso luputan pulis nga tinoodo nogi binuzu kinaantakan diho,” ka vagu disido, naamot minoboos do suvai ko kaanu papasabap kohigaganan kiniopon, tapanazan miaga diho nga kaanu nogi papasabap koubakan kumaa kamamot lotilik (electrical equipment) om susuutonon dino do kapasabap kakadasaan panaakan di asaasau id kinoizonon posoihi.

Ontok ponogi diho ka disido, kinaantakan diho nopo nga di koinduvo do nokoluput naantakan id Sabah di toun diti i popogompit kinohigaganan kiniopon.
Share |